Home » Shëndetësi » Shtatzënia

Shtatzënia

ShtatzëniaShtatzënia është një gjendje fiziologjike, e natyrshme, e cila nuk dëmton organizmin e nënës nëse tregohet kujdesi i duhur. Gjatë shtatzënisë, foshnja (fetusi) formohet dhe zhvillohet duke marrë lëndën ushqyese nga gjaku i nënës.

Kur nëna është e shëndetshme, merr ushqim të mjaftueshëm dhe bën jetë të rregullt, foshnja zhvillohet mirë dhe lind shëndetshëm.

Në rast se nëna sëmuret ose nuk bën jetë të përshtatshme për gjendjen e saj, foshnja dëmtohet dhe mund të lindë e dobët ose e sëmurë.

Gjithashtu ka mundësi që shtatzënia të përfundojë në dështim ose lindje të parakohshme.

Gjatë shtatzënisë gruaja mund dhe duhet të vazhdojë të punojë sipas kushteve të caktuara nga mjeku. Puna fizike dhe lëvizjet e përshtatshme jo vetëm që nuk janë të dëmshme, por vlejnë për mbarëvajtjen e shtatzënisë.

Në raste të rralla, kur mjeku e sheh të nevojshme, gruaja shtatzënë duhet t’i nënshtrohet regjimit. Puna e gruas shtatzënë konsiderohet puna pa sforco e ngarkesë, pa qëndrime të zgjatura në këmbë etj. Puna e rëndë fizike e dëmton gruan shtatzënë. Është i papërshtatshëm qëndrimi i saj i kërrusur, mbartja e peshave të mëdha, tërheqja e tyre dhe ngritja e sendeve me peshë të madhe.

Gruaja shtatzënë duhet të gjejë qetësi brenda familjes dhe shoqërisë. Ajo duhet ta presë fëmijën me gëzim dhe pa frikë. Në këtë periudhë duhet bërë kujdes për ushqyerjen. Sasia dhe kaloritë e ushqimit duhet të jenë të mjaftueshme. Cilësia e ushqimit ka shumë rëndësi, pasi foshnja tërheq lëndë me vlera ushqyese nga trupi i nënës. Ajo që është më e rëndësishme në muajt e parë të shtatzënisë, është gjendja shpirtërore e nënës. Gëzimi që ajo shpreh që në momentin e parë që kupton se është shtatzënë, ndikon në mënyrë të drejtpërdrejtë në zhvillimin e embrionit.

Mjekët shprehen se që në javët e para, embrioni është në gjendje të ndiejë ngrohtësinë dhe ledhatimet e nënës, apo pse jo edhe fjalët e babait.

Një tjetër faktor i rëndësishëm në zhvillimin normal të embrionit dhe në shëndetin e nënës, është edhe veshja që gruaja shtatzënë përdor. Pikë së pari, ajo duhet të mënjanojë idetë se gjatë kësaj periudhe do të shtojë në peshë apo do të duket më e shëmtuar. Ajo duhet të dijë se po përgatitet të sjellë në botë një fëmijë, që për të do të jetë më i bukuri i mundshëm.

Lidhur me veshjen, zakonisht, gratë shtatzëna nisin të duken pas muajit të katërt. Deri në këtë periudhë, nga jashtë nuk duket të ketë ndonjë ndryshim. Ajo që gruaja shtatzënë duhet të ketë kujdes me veshjen, ka të bëjë me kujdesin që duhet të tregojë kryesisht me pjesën e belit. Veshja e pantallonave apo fundeve të ngushta në bel, shton përzierje të barkut dhe të vjellat. Për këtë arsye, veshjet duhet të jenë të bollshme dhe të rehatshme.

Mënjanimi i këpucëve me takë të lartë gjatë shtatzënisë, është një kusht i domosdoshëm. Këpucët me takë të lartë shpërndajnë peshën e trupit në mënyrë të çrregullt, gjë kjo që ndikon edhe në ekuilibrin e gruas. Me rritjen e barkut, pjesa më e ngushtë e belit futet brenda, vithet dalin jashtë dhe shpatullat tërhiqen mbrapa. Kështu që këpucët e sheshta janë një domosdoshmëri gjatë kësaj periudhe.

Sipas studiuesve të Universitetit të Kembrixhit, rreziku që njeriu të zhvillojë ankth dhe depresion, mund të gjurmohet pas në kohë, që në ngjarjet që e kanë shoqëruar embrionin në mitrën e nënës.

Ian Colman dhe kolegët në Departamentin e Psikiatrisë përdorën të dhëna nga “Medical Research Council National Survey of Health and Development”, ku përfshinë 5.362 njerëz të lindur në 1946.

Duke u bazuar në matjet e kryera gjatë jetës së pjesëmarrësve në studim, deri në moshën 53-vjeçare, studiuesit identifikuan 6 trajektore të ndryshme të përshkuara gjatë jetës. 45% e të vëzhguarve nuk kishin shfaqur simptoma gjatë jetës së tyre, 33.6% kishin shfaqur simptoma të lehta, 11.3% kishin shfaqur disa simptoma gjatë adoleshencës dhe më pak gjatë moshës së pjekurisë, 5.8% kishin shfaqur simptoma në adoleshencë, por ato ishin zhdukur gjatë moshës së pjekurisë, 2.9% kishin disa simptoma në adoleshencë dhe kishin vuajtur nga simptoma të forta gjatë moshës së rritur dhe 1.7% ishin shoqëruar vazhdimisht nga simptoma të rënda gjatë jetës së tyre.

Gjatë këtij studimi rezultoi që sa më shpejt të ngrihet fëmija në këmbë dhe sa më herët të fillojë të ecë, aq më pak ka predispozitën të preket nga simptoma të ankthit dhe depresionit gjatë jetës së tij. Gjithashtu, Dr. Colman vë theksin në rëndësinë që luajnë ngjarjet, që shoqërojnë nënën gjatë shtatzënisë, në shfaqjen e simptomave të ankthit dhe depresionit gjatë jetës. Sa më e shëndetshme të jetë periudha e shtatzënisë së nënës, aq më i shëndetshëm do të jetë shëndeti i fëmijës gjatë jetës së tij. Sigurisht ky është një element në grupin e madh të faktorëve që mund të shkaktojnë ankthin dhe depresionin, siç janë trashëgimia, traumat apo ngjarjet stresuese gjatë jetës, sëmundjet fizike etj.

Kujdes për gratë shtatzëna është edhe stresi. Janë studiuar dhe në 75 për qind të rasteve është vënë re se tek shtatzënat me nivel të lartë të këtij hormoni janë shfaqur shenjat e depresionit. Për të kuptuar nëse një mama e re do të vuajë nga depresioni, mjafton të studiojmë nivelin e hormoneve të stresit në javën e 25-të të shtatzënësisë. Sipas një studimi të kryer nga Universiteti i Ajrvinit në Kaliforni, nëse niveli i hormoneve të kartiokotropinës është i lartë, atëherë ka shumë mundësi që mamaja të kalojë një periudhë të gjatë depresioni pas lindjes së fëmijës.

Nga ana tjetër, rregullat e shtatzënisë mund të jenë aq rigoroze sa që shumë ekspertë të fitness-it rekomandojnë që trupin ta përgatisin për shtatzëninë së paku një vit më parë. Edhe nëse planifikimi për të ngelur shtatzënë ndodh dy vite më parë apo dy javë, ju duhet të merrni hapa që të vini trupin dhe mendjen tuaj në vend./ Gazeta Standard

Publikoje ne:
  • Postoje tek Kapsit
  • Bookmark tek RuajFaqet
  • Facebook
  • Print this article!
© 2014 Keshilla.NET · RSS · Designed by Theme Junkie · Powered by WordPress