Në studim u përfshinë 38.000 vetë konsumues të kafesë dhe çajit, gjendja shëndetësore e të cilëve u vëzhgua për 13 vjet.

Shkencëtarët vunë re se personat që pinin çaj ose kafe më shumë se 6 filxhanë në ditë ishin në rrezik më të vogël për t’u prekur nga sëmundje në zemër, në krahasim me personat që konsumonin më pak se një filxhan në ditë. Edhe konsumimi i 2 deri 4 filxhanëve me çaj ose kafe në ditë ndikonte në uljen e rrezikut të vdekjes nga sëmundjet në zemër.

Por studimi tregoi gjithashtu se konsumimi i çajit dhe kafesë mes pjesëmarrësve në studim nuk kishte ndonjë ndikim për sa i përket rrezikut të goditjeve në tru. Shkencëtarët thonë se çaji përmban anti-oksidantë, gjë që mund të shpjegojë përfitimitet shëndetësore që rrjedhin nga çajit.

Konsumimi ditor i disa filxhanëve me çaj ose kafe, mund të zvogëlojë rrezikun për zhvillimin e sëmundjeve të zemrës- tregon një studim 13-vjeçar i realizuar në Holandë.
Të dhënat e grumbulluara nga 40.000 participantë, sugjerojnë se pirja ditore e 6 filxhanëve çaj ose 2-4 filxhanëve kafe, zvogëlon për 1/3 rrezikun për shfaqjen e sëmundjeve të zemrës.

Revista Journal of the American Heart Association transmeton mendimin e shkencëtarëve, sipas të cilëve ky efekt bazohet në veprimin e antioksiduesve të grupit të polifenoleve.
Polifenolet sjellin deri te zvogëlimi i dëmtimeve të shkaktuara nga proceset inflamatore dhe në këtë mënyrë zvogëlojnë prirjet për zhvillimin e sëmundjeve të zemrës.

Kosi dhe bakteret e mira
Thuhet se ndër bakteret që ndikojnë për të mirë në shëndetin e njeriut, janë ato që gjenden në kos. Këto quhen edhe baktere të mira. Por sa e vërtetë është kjo?
Sipas një studimi, kosi që përmban baktere të mira pakësoi 19 për qind numrin e infeksioneve të zakonshme mes fëmijëve.

Në studim u përfshinë 638 fëmijë nga mosha 3 deri 6 vjeç të cilët shkonin në kopsht 5 ditë në javë.
Për efekt studimi, fëmijët u ndanë në dy grupe. Grupit të parë iu dha një lloj kosi që përmban bakter L. Ky bakteri quhet i tillë sepse ka formën L, por edhe sepse është bakter i gjallë. Grupit tjetër të fëmijëvë iu dha  kos pa bakter. Prindërve dhe fëmijëve iu tha se çfarë kosi merrnin fëmijët e tyre.

Rezultatet e studimit treguan se fëmijët që hëngrën kos me bakter L, u prekën 24 pëqind më pak nga infeksione në sistemin e tretjes si diarreja e të vjella. Ata gjithashtu u prekën 18 përqind më pak edhe nga infeksione në vesh, hundë e grykë, në krahasim me grupin e  fëmijëve që hëngri kos pa baktere të mira.
Studimi u financua nga ndërmarrja e prodhimit të kosit Dannon dhe u krye nga shkencëtarë të fakultetit të mjekësisë së universitetit Xhorxhtaun.

Marrëdhëniet romantike dhe shëndeti mendor
Sipas një studimi, meshkujt preken emocionalisht më shumë sesa femrat në marrëdhëniet dashurore. Prandaj edhe plagët shpirtërore nga prishja e marrëdhënieve mbyllen më me vështirësi mes djemve sesa vajzave, thuhet në studim. Studimi hedh poshtë mendimin e përgjithshëm se femrat e kanë më të vështirë kur ndahen nga të dashurit.

Studimi u krye nga shkencëtarët në universitetin Wake Forest ku u morrën në shqyrtim mbi 1 mijë të rinj nga mosha 18 – 23 vjeç, në marrëdhënie romantike. Megjithëse meshkujt në dukje dukeshin më të fortë shpirtërisht, të dhënat treguan se marrëdhëniet dashurore ndikonin tek ata më shumë sesa tek femrat.

Gjendja e tyre emocionale prekej më shumë nga cilësia e marrëdhënieve aktuale, ndryshe nga shumë femra që afektoheshin emocionalisht nga ekzistenca ose jo e këtyre marrëdhënieve. Dhe, ndërsa vajzat priren të reagojnë në shqetësime emocionale përmes depresionit, meshkujt zakonisht i shprehin shqetësime duke pirë alkohol ose duke marrë drogë. Për meshkujt, një marrëdhënie romantike është zakonisht burimin kryesor i afërsisë, ndërsa tek femrat ka të ngjarë të kenë marrëdhënie të ngushta me familjen dhe miqtë. Shkencëtarët besojnë se studime të tjera nevojiten mbi këtë çështje në mënyrë që të kuptohet më mirë shëndetit mendor i të rinjve dhe të rejave  gjatë procesit të marrëdhineve romantike.

Mitet dhe kontradiktat mbi konsumimin e kafesë
Konsumatorët e kafesë ende nuk janë të qartë nëse kafeja ka efekte pozitive apo negative në shëndetin e tyre. Kjo pasi studime të ndryshme gjatë viteve kanë dhënë edhe rezultate të ndryshme, madje shpeshherë edhe kontradiktore. Një artikull i publikuar disa ditë nga e përditshmja amerikanë “New York Times” tregon mbi këto studime, mitet ekzistuese rreth kafesë, dhe efektet e saj në organizmin e njeriut.

A ka mundësi që këto kontradikta për kafenë dhe kafeinën të jenë të drejta? Përgjigjja është po, pasi kafeja dhe çaji, mbi të gjitha kanë në përbërjen e tyre kimikate të ndryshme, të cilat mund të ndikojnë në forma e mënyra të ndryshme në shëndetin e njeriut.
Hidratimi
Për një kohë të gjatë tek njerëzit dhe një grup mjekësh mbizotëronte mendim,i se kafeja dhe kafeina ishin diuretike. Por studimet e kryera vitet më të fundit treguan se njerëzit të cilët konsumojnë deri në 550 miligramë kafeinë në ditë prodhojnë urinë po aq sa ata persona të cilët nuk marrin kafeinë. Por konsumimi i kafeinës mbi 575 miligramë, kthehet në diuretike. Kështu nëse ju konsumoni rreth 330 miligramë kafeinë në ditë, nuk do ju duhet të urinoni më tepër se në rastin kur do të pinit 400 mililitra ujë. Personat të cilët konsumojnë një sasi të caktuar kafeine brenda dozave të lejuara, janë të hidratuar, dhe ashtu si uji, ndihmon në nevojat e organizmit për lëngje.

Sëmundjet e zemrës
Pacientët që kanë probleme me zemrën, sidomos ata që kanë presionin e lartë të gjakut, duhet të konsumojnë në një masë të caktuar kafenë dhe kafeinën, pasi njihen efektet e saj stimuluese. Por studimet e kryera 10 vitet e fundit në mbi 400 000 persona treguan se rastet e sëmundjeve e zemrës nuk tregojnë rritje te njerëzit të cilët vazhdojnë të konsumojnë kafen e mëngjesit, me apo pa kafeinë. “Kundërshti që duhen besuar”, përfundojnë kardiologët e Universitetit të Kalifornisë, në San Francisko. Evidencat tregojnë se kafeja dhe kafeina e konsumuar në sasi të caktuara rrit rrezikun për shfaqjen e problemeve të zemrës, atakut kardiak, vdekja e hershme apo edhe prishje e ritmit të zemrës. Por në fakt tek 27 000 gra të studiuara në 15 vjet në qendrën e Studimeve të shëndetit të gruas në Iowa, rezultoi se gratë që pinin një deri në tre kafe në ditë reduktonin në 24 për qind rrezikun e problemeve kardiovaskulare.

Të dhëna shkencore
Kafeja përmban taninë dhe antioksidante, që janë të mirë për zemrën dhe arteriet. Kafeja mund të lehtësojë dhimbjet e kokës. Ajo është e mirë për mëlçinë dhe mund të ndihmojë në parandalimin e cirrozës dhe gurëve në veshka. Dhe kafeina në kafe mund të zvogëlojë rrezikun e krizave të astmës dhe ndihmon në përmirësimin e qarkullimit brenda zemrës.

Por nuk mund të mohohet se kafeja nuk është e mirë për të gjithë. Nëse pi më shumë se ç’duhet mund t’iu bëjë nervozë, mund të shkaktojë shpejtim të rrahjeve të zemrës dhe dridhje të duarve. Gratë shtatzëna, të sëmurët me zemër dhe ata që vuajnë me ulcera në stomak zakonisht këshillohen ta shmangin kafenë. Dr.Trombeti thotë se asnjë nuk duhet të pijë më shumë se 3-4 filxhanë në ditë.

Kafeja ndikon mirë për:
- zemrën e arteriet
- dhimbjet e kokës
- mëlçinë
- cirrozën
- gurët në veshka
- astmën

Për një mbrëmje dimri dhe për një çift, ajo natë do të mbetet e paharruar, andaj gjatë bisedës suaj ju propozojmë pije jashtëzakonisht të shijshme dhe të ngrohta. Është mjaft lehtë të përgatiten, por shija e ëmbël është vështirë të harrohet.

Për përgatitjen e verës së zier nevojiten:
5 dl verë e zezë shumë e fortë dhe gjysmë e vakët, 3 dl ujë ,3 lugë sheqer, 1/2kanellë,  limon, 2 kokrra piper.

Përgatitja:
Përziejeni verën dhe ujin, shtoni sheqerin dhe vërini në një zjarr jo të madh dhe i përzieni derisa të shkrihet sheqeri. Menjëherë shtoni të gjithë artikujt e fituar, limonin e pastroni mirë, e ndani në disa pjesë dhe e lini të zihet së bashku me verën. Keni kujdes verën. Le të qëndrojë në zjarr për disa minuta. Para shërbimit, verën e hidhni në gota prej qelqi.

Për përgatitjen e çokollatës së nxehtë nevojiten:
200 ml krem të ëmbël, 200 ml qumësht, 50 g qumësht me çokollatë ,50 g çokollatë me lajthi të bluar, 25 g puding të çokollatës.

Përgatitja:
Përziejeni qumështin dhe kremin dhe i vëni të ngrohen. Largoni nga zjarri dhe i përzieni pudingun të cilin më herët e keni përzier me pak qumësht të ftohtë. Shtoni çokollatën dhe përsëri e zieni derisa të trashet, gjithmonë duke e përzier. Kur e tëra të jetë shkrirë, e largoni nga zjarri, përziejeni me çokollatë dhe e hidheni në gotë. Nëse dëshironi që pija të jetë pakëz më e hollë, atëherë shtoni më shumë qumësht. Mund t’i shtoni edhe aromat, si: vanilje, lajthi, portokall, kanellë, e më popullarizuari është  ‘beilis’

Për përgatitjen e punshit nga çaji nevojiten:
1 litër çaj i nxehtë rusi, 200 g sheqer, 3 dl rum dhe limon.

Përgatitja:
Zini çaj të fortë dhe hidhni sheqer. Në gota më të mëdha hidhni rum dhe e përzieni me çaj të nxehtë. E përzieni mirë dhe e shërbeni. Sipas shijes suaj, në punsh mund të shtoni edhe lëng prej limoni.

Për përgatitjen e kafes irlandeze nevojiten:
1 gotë uiski, 2 lugë me përmbajtje karameleje, sheqer, krem dhe kafe.

Përgatitja:
Vëni sheqerin që të marrë aromën prej karameleje dhe hidhni disa gota ujë. Kur të fitohet një ngjyrë e këndshme, në gotën në të cilën paraprakisht keni hedhur uiskin, hidhni sheqer. Më pas ziejeni kafe të zezë e të fortë dhe ashtu të nxehtë e hidhni sipër uiskit dhe sheqerit. Përziejeni mirë dhe sipër saj hidhni kremin e ëmbël.

Më së miri është që çaji të pihet pa asnjë shtesë, por nëse nuk ju pihet i tillë, atëherë mund t’i shtoni limon dhe mjaltë, por vetëm kur çaji të jetë ftohur. Mjalti dhe limoni humbin vetitë e tyre të dobishme, kur të qiten në çaj tepër të nxehtë.

Çaji Menta
Përpos që ka shije dhe aromë të mirë, çaji i mentës ka edhe shumë veti mjekuese. Ai është shumë efikas te mjekimi i ftohjes, e ndihmon edhe te problemet me tretje, meqë qetëson lukthin dhe zorrët. Menta ndikon mirë edhe në sistemin nervor, prandaj u preferohet personave nervozë dhe me ankth. Ndihmon edhe te kokëdhembja dhe mundimi.
Çaji jeshil
Çaji jeshil (i gjelbër) ka prejardhjen nga Kina dhe ka veti të mëdha antioksiduese. Zvogëlon rrezikun nga sëmundjet e zemrës dhe enëve të gjakut, karcinoma dhe shumë sëmundje të tjera kronike. Çaji jeshil lehtëson tretjen, por ka ndikim të dobishëm edhe në lëkurë. Nga shumë njerëz konsiderohet si çaji më i shëndetshëm i cili mund të parandalojë shumë sëmundje. Meqë përmban edhe kafeinë, përdoret edhe si stimulues.

Aloe vera
Qysh në Egjiptin e lashtë, aloe vera është përdorë si ilaç, por konsiderohej edhe eliksir i jetëgjatësisë. Indianët me aloe kanë shëruar plagët, kokëdhembjen dhe artritin. Aloe vera ka shumë veti mjekuese, e ndihmon veçanërisht te artriti, psoriaza dhe ekzema. Çaji nga aloe vera preferohet për forcimin e imunitetit, si dhe ka veti antiinflamatore.

Çaj Hithi
Çaji i hithit që nga lashtësia përdoret për mjekimin e inflamacionit të rrugëve urinare dhe te sëmundjet e veshkave. Hithi ka sasi të mëdha të kaliumit i cili është diuretik natyror, por edhe hekur, i cili ndihmon në krijimin e rruazave të kuqe të gjakut. Çaji i hithit pastron gjakun dhe nxitë përtëritjen e qelizave. Preferohet edhe si ilaç për lëkurën problematike.

Çaj Kamomili
Çaji i kamomilit te ne përdoret bukur shpesh, meqë relakson, është i mirë për tretje, zbutë dhembjen, zvogëlon urtikarien, e ndihmon edhe te ngërçet. Për shkak të vetive të tij, çaji i kamomilit përmirëson pamjen e lëkurës e flokët i bën më të forta dhe më të shëndetshme. Femrat shpesh përdorin çajin e kamomilit për zbutjen e problemeve menstruale.

Çaj Bliri
Çaji i blirit po ashtu përdoret në vendin tonë. Dihet se ky lloj çaji ofron ndihmë të madhe te ftohja, gripi dhe fyti i irrituar. Përdoret edhe si ilaç natyror kundër pagjumësisë, e është edhe i mirë për relaksim, meqë qetëson nervat. Për këtë shkak, ai u preferohet njerëzve që janë të ngarkuar psiqikisht. Por, duhet pasur kujdes, se sasitë e mëdha të çajit të blirit mund të shkaktojnë probleme me zemër.

Me ardhjen e dimrit organizmi ka nevojë të adoptohet me temperaturat e ulëta. Ka shumë mënyra për ta bërë, duke filluar nga veshja gjithnjë e më e rëndë.

Por për t’i bërë ballë trishtimit të ditëve dimërore gri është mirë të mësohemi të përkëdhelemi pak edhe nëpërmjet ushqimit. Në fakt organizmi në stinën e dimrit kërkon më tepër kalori. Por megjithatë nuk duhet ekzagjeruar: më mirë një supë ose një çaj.

Rrugë të lirë supave, lëngjeve ose djathërave, karburante të nevojshme për organizmin dhe mburoja të shkëlqyera kundër të ftohtit.

Praktikisht çfarë ndryshohet në ushqimet dimërore? Dhe cilat ushqime duhen privilegjuar kur termometri afrohet me zeron?

Ushqimet e dobishme:

Dieta dimërore i përgjigjet pikë së pari ligjeve të natyrës, që përfshijnë frutat dhe perimet e stinës. Pra përveç frutave dhe perimeve dimërore edhe: makarona, bukë dhe oriz; peshk; bishtajore; djathë e vezë. E përse jo, meqë ekzistojnë efektet pozitive të kakaos në zemër, qarkullim, përqendrim e humor, shpeshherë të pish një filxhan çokollatë të ngrohtë.

Nuk është e vërtetë që të pish pije alkoolike të ndihmon të luftosh të ftohtin. Kundër temperaturave të ulëta, është mirë të pish: çaj të ngrohtë, verë brulë, një filxhan çokollatë. Nuk mund të mungojnë edhe barërat dhe lulet speciale. Kur temperaturat bie nën zero, më mirë se konjaku, rumi, vodka duhet të përdoret vera brulë. Për ta përgatitur mjafton të ziesh verë të kuqe dhe të shtosh rrënjë karafili dhe pak kanellë. Hidhni sheqer (gjysmë luge në një gotë) dhe shtoni lëkurën e portokallit ose limonit. Shërbejeni të ngrohtë.

Yndyrat ushqimore:
Më poshtë ju do të njiheni me vlerat e yndyrave ushqimore në dietat tona. Kur janë të dobishme e kur janë të dëmshme. Yndyrat ushqimore në përgjithësi luajnë një rol të rëndësishëm në organizmin e njeriut.

Ato janë pjesë e rëndësishme dhe e domosdoshme e racionit ditor ushqimor: Kanë vlerë të lartë energjetike (kalorike). Një gram yndyrë jep mesatarisht 9 kalori, domethënë sa dyfishi i sheqernave dhe i proteinave; Yndyrat bëjnë pjesë në ndërtimin e indeve të organizmit të njeriut; Yndyrat janë tretëse dhe bartëse të vitaminave A, D, E, K, shumë të rëndësishme për organizmin e njeriut; Yndyrat, por jo të gjitha, përmbajnë në përbërjen e tyre disa acide yndyrore të pangopur, si linoleik, linolenik, arahidonik, që luajnë rolin e vitaminës F në organizëm, me vlerë të lartë biologjike; Yndyrat ushqimore kanë dhe veti lubrifikuese, sepse duke u sekretuar nga gjëndrat e lëkurës, i japin kësaj elasticitetin dhe e ruajnë nga tharja. Pra në pamjen estetike te fytyrës e pjesëve te tjera të trupit.

Energjia në një gotë:

Me vitamina dhe kripëra minerale lëngjet e frutave japin karikim nëse ndjeheni të rënë moralisht. Ja dy lloje: me dhe pa qumësht.
Me qumësht
1 mollë, 1 dardhë, 1 banane
dy lugë sheqer
qumësht sa duhet
Pa qumësht
1 mollë, 1 kivi
2 lugë sheqer
lëng portokalli dhe pak limon

Lista e ushqimeve dimërore:

Kungulli
Është i pasur me vitaminë A, e nevojshme për të luftuar radikalet e lira. Përmban gjithashtu kalium, kalcium, fosfor dhe fibra.

Peshku
Është aleat i shkëlqyer kundër sëmundjeve të zemrës e të qarkullimit. Merita është e yndyrave Omega-3 që gjenden në të gjithë llojet e peshqve. Peshqit e yndyrshëm si toni, salmoni etj, janë të pasur me vitaminë D.

Agrumet
Portokajtë, mandarinat, limonët dhe grejpfrutat kanë shumë vitaminë C. Forcojnë mbrojtjet natyrale dhe janë ilaç i vlefshëm kundër gripit. Prania e acidit citrik lehtëson tretjen.

Mishi
Nëse përdoret shpesh mishi i pulës, i gjelit të detit ose mishi i përgjithshëm i kuq, tani është e mundur të shtohet në dietë edhe mishi i derrit, që është pak më i dhjamosur. Mishi është i pasur me proteina, hekur, zink e vitamina B12 të nevojshme për të gjithë, e jo vetëm për anemikët. Mishi u jep energji muskujve dhe lufton lodhjen.

Lakra
Të gjitha llojet e lakrave janë të pasura me kalcium dhe parandalojnë sëmundjet e stomakut e të zorrëve. Përmbajnë vitamina A,E C dhe fitoestrogjene, substanca që mbrojnë nga tumoret.

Çokollata
Është antidepresiv i shkëlqyer. Prania e kafeinës dhe teobromirës ka efekte pozitive në përqendrimin e studentëve dhe në tonifikimin e muskujve.

Perimet
Qiqrat, fasulet, thjerrëzat dhe bizelet nëse hahen me makarona, bukë ose oriz, janë shumë të mira, veçanërisht nëse ndjehesh i këputur. Arrijnë të furnizojnë deri 40 % më shumë proteina në krahasim me një vakt me ushqime të tjera. Perimet janë të pasura me karbohidrate, vitamina B dhe minerale si kalcium, hekur dhe fosfor, të nevojshme për shëndetin e organizmit.

Frutat e thata
Kanë fuqi të lartë kalorike dhe janë efikase për ato që bëjnë punë të rënda në vende të ftohta. Lajthi, kikirikë, bajame, arra janë të pasura me kalcium, fosfor, hekur, bakër, magnez e zink, të nevojshme për të luftuar dobësinë dhe për të përmirësuar mbrojtjet natyrale. Është e pranishme dhe vitamina E. Ngaqë përmbajnë shumë kalori (për shembull 625 kalori 100 g lajthi) frutat e thata nuk këshillohen për ata që duan të dobësohen.

Djathi
I freskët, pikant ose me kripë, ka një vlerë ushqyese të lartë. Është i pasur me proteina dhe kalori. Përmban kalcium, mineral i nevojshëm për formimin e kockave të fëmijëve dhe për formimin e dhëmbëve, është i nevojshëm edhe për gratë në menopauzë dhe për të moshuarit. Në dimër djathi i pasur me yndyra e mban konstant temperaturën trupore edhe kur është shumë ftohtë. Është i nevojshëm në të gjitha stinët për të ruajtur impulset nervore.

Mjalti
Mjalti është qetësues, përdoret kundër dhimbjes së fytit dhe kollës, është dezintoksikues sepse favorizon funksionimin e mirë të mëlçisë dhe zorrëve; përmban vitamina C, B dhe kripëra minerale si fosfor, kalcium, hekur.
Makaronat, buka dhe orizi
Të pasura me sheqerna, makaronat japin shumë energji. Së bashku me bukën dhe orizin, janë në gjendje të riekuilibrojnë nivelet e serotoninës, hormoni përgjegjës për humorin. Ato luftojnë gjithashtu kapsllëkun.

Çajrat kundër të ftohtit

Çajrat kanë efekt mekanik, sepse kur janë të nxehtë të ngrohin. Doza: nga 1 në 3 filxhanë çaj në ditë.
Trëndafil i egër
Çaji (gjendet në bustina dhe ka vitaminë C) për të rritur mbrojtjet natyrale të organizmit dhe rezistencën ndaj sëmundjeve të ftohjes falë përmbajtjes së lartë të vitaminës C.
Lule bliri
Çaj shumë i dobishëm për të parandaluar ftohjen dhe temperaturën. Favorizon djersën.
Lule shtogu
Çaj që ka të njëjtën vlerë me blirin. Mund edhe të përzihet me lulet e blirit dhe të përgatitet çaji.
Lule pishe

Çaj për parandalimin e infeksioneve të rrugëve të frymëmarrjes.
Rrënjë jamballi
Është efikas për aparatin tretës dhe të frymëmarrjes. /Gazeta Albania/